Ka reaguar për herë të parë pas shkarkimit nga detyra ish-ministri i Brendshëm Bledi Çuçi.
Në një postim në rrjetin social “Facebook”, Çuçi shkruan se për të ishte nder ta ushtronte detyrën e ministrit të Brendshëm dhe falënderon kryeministrin Rama për besimin dhe mbështetjen që i ka dhënë.
Ndër të tjera, ish-ministri i Brendshëm shkruan se ka punuar e shërbyer me integritet. Në fund të reagimit, ai i uron suksese pasuesit të tij, Taulant Ballës.
“Falënderoj kryeministrin Rama për besimin dhe mbështetjen që më ka dhënë këto dy vite e gjysmë në detyrën e vështirë të Ministrit të Brendshëm. Për mua ka qenë nder dhe përgjegjësi e madhe të ushtroja këtë funksion të lartë publik dhe shumë të rëndësishëm.
Prej ditës së parë kur e mora atë detyrë e deri më sot kam punuar e shërbyer me integritet dhe bashkë me skuadrën e Ministrisë së Brendshme kemi adresuar shumë sfida që lidhen me sigurinë, rendin publik, emigracionin, gjendjen civile dhe pushtetin vendor. Një falënderim i veçantë shkon për të gjithë ata që ishin krah meje në këtë rrugëtim sfidues. Suksese Taulantit në sfiden e re, për të vijuar me reformat transformuese në këtë ministri e veçanërisht në Policinë e Shtetit”, shprehet Çuçi./Opinion.al
