Disa javë më parë kryebashkiaku i Tiranës, Erion Veliaj njoftoi se ishte shëruar nga Covid-19. Sot ai deklaroi se ka vendosur t’i përgjigjet thirrjes për dhurimin e plazmës së gjakut për kurimin e të infektuarve me koronavirusin e ri.
Teksa mbante fjalën e tij në këshillin bashkian, Veliaj ftoi dhe anëtarët e tjerë, që e kanë kaluar virusin, që të dhurojnë plazmën e cila po konsiderohet si një formë kure.
“Do jem i pari nga Bashkia si kryetar që do dhuroj plazmën për ata që kanë nevojë për këtë trajtim. Ndërkohë që ftoj të gjithë anëtarët e tjerë (që e kanë kaluar) të bëjnë të njëjtin veprim. Ka stigmë për ata që nuk dhurojnë, kur njerëzit kanë frikë dhe një lloj droje. Lipset solidaritet për ata që kanë droje që ta bëjnë këtë”, u shpreh Veliaj.
Në plazmën e gjakut të personave që e kanë kaluar Covid-19 gjenden anti-trupa që luftojnë virusin dhe në këtë mënyrë shanset për shërimin e pacientëve të infektuar janë më të mëdha.
Në datë 25 gusht në spitalin Infektiv nisi trajtimi i të infektuarve me plazmë gjaku.
Më pare, shefi i Urgjencës, Skënder Brataj ka njoftuar se edhe ai do të dhurojë plazmën e gjakut duke qenë se e ka fituar betejën me koronavirusin e ri. /Opinion.al
