Bledi Çuçi ka reaguar pas rikonfirmimit nga kryeministri Edi Rama në postin e ministrit të Brendshëm në mandatin e të tretë qeverisë së socialistëve.
Nëpërmjet një postimi në rrjetet sociale, Çuçi shkruan se është i gatshëm të përballet me sfidat për të çuar Policinë e Shtetit në një tjetër nivel.
“Rikonfirmimi në postin e Ministrit të Brendshëm dhe drejtimi politik i qarkut Berat janë një tjetër vlerësim nga Kryeministri dhe Partia Socialiste, po aq sa edhe një përgjegjësi e lartë në të njëjtën kohë. Në krye të këtij institucioni kaq shumë të rëndësishëm do të vazhdoj të punoj për të çuar përpara sfidat që lidhen me garantimin e rendit, sigurisë publike, jetës e pronës së qytetarëve, si dhe me përballjen me paligjshmërinë. Kontrolli i territorit, lufta ndaj kriminalitetit dhe ngritja e punës së Policisë së Shtetit në një tjetër nivel, mbeten prioriteti ynë i përbashkët përgjatë mandatit të tretë. Mandat që është një kontratë e re besimi për të vijuar me punët e nisura, për të bërë shkëputjen e madhe të vendit dhe për ta ndërtuar këtu të ardhmen tone”, shkruan mes të tjerash Çuçi./ Opinion.al
