Detaje të reja janë zbuluar nga ngjarja e rëndë e ndodhur në fshatin Sheq në Fier, ku u ekzekutua 42-vjeçari Shkëlzen Kastrati.
Sipas Abc news pas ekzaminimit të trupit të Kastratit, rezultuan se një plumb e ka marrë në pjesën e krahut, ndërsa një plumb e ka goditur në kokë, i cili i ka marrë edhe jetën.
Pas ngjarjes, efektivët kanë shoqëruar në Policinë e Fierit dhe kanë marrë në pyetje disa dëshmitarë okularë, të cilët kanë treguar çfarë kanë parë. Ndërkohë janë sekuestruar edhe pamjet e kamerave të sigurisë së bizneseve në këtë zonë, që mund të ndihmojnë në identifikimin e autorëve.
Edhe pse ende nuk ka një pistë të saktë, dyshohet që hasmëria dhe konfliktet e vjetra mund të kenë çuar në ekzekutimin e 42 vjeçarit, vetëm pak metra larg biznesit të tij dhe në një rrugë që e frekuentonte pothuajse përditë.
Kujtojmë se ngjarja ndodhi të hënën në mesditë në rreth-rrotullimin e Sheqit në Fier. Policia informoi se pas ngjarjes, autori është larguar me një makinë tip “Range Rover”, e cila u gjet më pas e djegur në fshatin Daullas të Fierit. Ndërkohë që gjatë kontrollit brenda makinës së djegur efektivët gjetën një armë tip “Scorpion” me silenciator, e cila dyshohet se është përdorur nga autori./Opinion.al
