Ramazan Mataj, 33 vjeç u gjet i vrarë brenda automjetit të tij në një rrugë në fshatin Dragoç të Shkodrës.
Policia tha se 33-vjeçari është qëlluar me breshëri plumbash brenda automjetit me të cilin udhëtonte.
Trupi i pajetë i të riut brenda automjetit u gjet nga disa banorë të zonës pasi atentati ndaj tij ka ndodhur në një rrugë larg banesave të fshatit.
“Rreth orës 07:15, në fshatin Dragoç, në rrugë, është qëlluar me armë zjarri në drejtim të automjetit tip Benz, me drejtues shtetasin R. M., 33 vjeç, banues në Dragoç, Shkodër, i cili ka humbur jetën.
Në vendngjarje kanë shkuar shërbime të shumta të Policisë dhe Forca Kombëtare e Sigurisë, Njësia Shkodër.
Është ngritur një grup i posaçëm hetimor dhe në drejtimin e Prokurorisë vijojnë intensivisht hetimet për zbardhjen e rrethanave dhe sigurimin e provave, me qëllim dokumentimin ligjor të rastit, identifikimin dhe kapjen e autorëve“, sipas njoftimit të policisë.
Ende nuk dihet arsyeja e vrasjes së 33-vjeçarit dhe identiteti i autorit apo autorëve, ndërsa po hetohet për zbardhjen e ngjarjes së rëndë.
