Një prej tre të plagosurve një natë më parë në rrugën “Jeronim de Rada” në Prishtinë ndërroi jetë sot në spital.
Viktima ishte kalimtare e rastit në vendin ku pati të shtëna me armë zjarri, si pasojë e të cilave u vra një person dhe u plagosën edhe dy të tjerë.
Shefi i Klinikës Intensive, Shaqir Uka tha për KosovaPress tha se gruaja nuk ka arritur t’u mbijetojë plagëve.
“Fatkeqësisht pacientja që ju i referoheni nuk ka arritur t’i bëjë ballë plagëve që ka pësuar nga arma e zjarrit mbrëmë, përkundër tretmanit mjekësor edhe atij medikamendor dhe atij kirurgjik që e ka marrë dhe pacientja fatkeqësisht ka ndërruar jetë në ora 10:45 në repartin intensiv ku ka qenë tu e marr trajtimin mjekësor”, tha Uka.
Sipas tij në njësinë e Kliniken Intensive kanë pasur vetëm këtë paciente nga incidenti i mbrëmshëm.
Nga ana tjetër, zëdhënësja e Prokurorisë Themelore në Prishtinë, Laureta Ulaj tha se në vendin e ngjarjes janë sekuestruar gëzhoja, makinë dhe prova të tjera materiale të cilat do të shërbejnë për ngjarjen, ndërsa autorët vijojnë të jenë në arrati.
