Kryetari i Partisë Demokratike, Lulzim Basha ka reaguar në lidhje me lajmin se doktori i njohur Dhimitër Kraja është infektuar me koronavirus.
Edhe pse në pension, profesor Kraja iu përgjigj thirrjes së Ministrisë për të ndihmuar në këtë situatë të vështrirë të krijuar nga koronavirusi.
Basha i ka uruar shërim të shpejtë dhe vlerëson kthimin e tij në repartin e infektivit pasi kishte shërbyer aty për 48 vite.
Mesazhi i Lulzim Bashës
Asgjë nuk e ndali doktor Dhimitër Krajën të rikthehet pas 48 vitesh në repartin e infektivit për të ndihmuar dhe shpëtuar jetët e pacientëve. Guximi, humanizmi, profesionalizmi dhe solidariteti njerëzor rrëzuan çdo pengesë, dhe e rikthyen atë në krah të kolegëve të tij, në mbrojtje të jetës dhe shëndetit të bashkëqytetarëve nga virusi i rrezikshëm që e preku dhe atë vetë.
I uroj nga zemra doktor Dhimitrit shërim të shpejtë! Urime dhe lutje për shëndetin e tij burojnë nga zemra e çdo shqiptari. Sot si kurrë më parë nderojmë dhe vlerësojmë sakrificat e mjekëve dhe infermierëve tanë që përballen çdo orë me rrezikun dhe sfidat e vështira të shpëtimit të jetëve nga pandemia e COVID-19. /Opinion.al
