Brigadieri i minierës në Bulqizë është vënë në hetim për shkak të shpërthimit të një sasie gazi, ku për pasojë tre minatorë pësuan djegie trupore.
Sipas uniformace blu bëhet fjalë për shtetasin L.Xh., 55 vjeç, banues në Bulqizë, i cili akuzohet për veprën penale “Shkelja e rregullave të mbrojtjes në punë”.
“Specialistët për Hetimin e Krimeve të Komisariatit të Policisë Bulqizë referuan materialet në Prokurori dhe nisi procedimi penal për shtetasin L.Xh., 55 vjeç, banues në Bulqizë, me detyrë brigadier i subjektit minerar për veprën penale “Shkelja e rregullave të mbrojtjes në punë”, pasi dyshohet se nuk ka kontrolluar frontin e punës dhe punonjësit që punonin në atë nivel.”– njofton policia.
Kujtojmë se 3 ditë më parë u plagosën 3 minatorë pasi shpërtheu një sasi gazi në minierë. U raportua se brigadieri i minierës nuk kontrolloi frontin e punës.
Tre minatorët e plagosur, të identifikuan si Rrahim Karaj, Allan Cakalli dhe Trifon Snalla, u dërguan pranë spitalit të Bulqizës, ku dhe kanë marrë edhe ndihmën e parë mjekësore.
Ngjarja ka ndodhur në minierën AlbChrome, ku gjatë punës në nivelin 17 të pusit, dyshohet se ka shpërthyer një sasi gazi.
Materialet procedurale i kaluan Prokurorisë pranë Gjykatës së Shkallës së Parë të Juridiksionit të Përgjithshëm Dibër, për veprime të mëtejshme.
