Kryeministri Edi Rama ka reaguar pas plagosjes me thikë të efektivit të policisë, Redi Çaushaj, i cili ndërhyri për të ndarë një sherr mes disa personave në fshatin Pilur në Himarë.
Përmes një postimi në rrjete sociale, kryeministri Rama ka publikuar një foto të policit 25-vjeçar në shtratin e spitalit, ndërsa ka shprehur respekt për gjestin e tij.
“Respekt për Redin Çaushajn, të riun e Policisë së Shtetit që u plagos duke ndërhyrë dhe shmangur më të keqen mes dy individëve në një sherr të rrezikshëm🙏”, shkroi kreu i qeverisë.
Një ditë më parë, efektivi u vizitua nga ministri i Brendshëm Taulant Balla, i cili kërkoi dënim të ashpër për autorin që goditi policin më 15 gusht 2023.
Kujtojmë se ngjarja ndodhi mbrëmjen e së martës (15 gusht) në Pilur, ku efektivi, i cili jashtë shërbimit, ndërhyri për të ndarë një sherr mes disa personave. Por efektivi Redin Çaushaj është goditur me thikë nga 60-vjeçari, Thodhor Mërkuri, i cili pas ngjarjes u arratis.
Ai u vendos në pranga mëngjesin 16 gushtit nga uniformat blu, në ambientet e ish-repartit ushtarak në fshatin Pilur. 25 vjeçari raportohet se ishte me detyrë inspektor i Policisë së zonës në Lukovë./Opinion.al
