Pasi Sekretariati i Etikës vendosi që t’i përjashtonte me 10 ditë nga punimet e Kuvendit, dy deputetet e opozitës, Elda Hoti dhe Albana Vokshi kanë kundërshtuar vendimin.
Përmes një shkrese drejtuar Byrosë së Kuvendit, dy deputetet e cilësojnë vendimin të paligjshëm.
Sipas tyre, mbledhja e Sekretariatit të Etikës është mbajtur on-line në shkelje të Rregullores së Kuvendit e cila në asnjë rast nuk parashikon që mbledhjet e këtij Sekretariati, mund të mblidhen on-line.
Gjithashtu ato shprehen se pretendimet e 7 deputetëve socialistë për shkelje janë tendecioze dhe të pabazuara.
“Mbledhja e Sekretariatit është mbajtur on-line, në shkelje të Rregullores së Kuvendit e cila në asnjë rast nuk parashikon që mbledhjet e këtij Sekretariati, mund të mblidhen on-line. Pretendimet e shtatë deputetëve (4 prej tyre zonja deputete) në adresë të dy zonjave Deputete për “shkelje”, janë të pabazuara, tendencioze, të përgjithshme dhe të paindividualizuara sa duhet, si dhe mbi të gjitha, veprimet që atribuohen sipas kërkuesve nga dy zonjat deputete objekt i procedimit dhe/apo aktet e tyre nuk parashikohen në Rregulloren e Kuvendi si shkelje”, theksohen në dokument.
Albana Vokshi dhe Etilda Hoti pretendojnë se kanë protestuar paqësisht dhe qetësisht, duke qëndruar në këmbë me pankarta në duar.
Kjo provohet lehtësisht. mjafton që Sekretariati të kishte administruar procesverbalet e seancës së 15 shkurtit dhe materialet video të saj. Por kjo gjë nuk ka ndodhur, sepse urdhëri për dënimin e dy deputeteve ka qenë politik dhe i paracaktuar.
Përsa i përket pajisjeve zhurmuese, tërheqim vëmendjen tuaj se sipas Rregullores së Kuvendit (varianti i fundit), sanksionohet me masa disiplinore përdorimi i materialeve piroteknike, por në asnjë rresht të Rregullores nuk parashikohet ndalimi i mjeteve zhurmuese”, shprehen deputetet.
Kujtojmë se dy deputetët u akuzuan nga PS-ja se bllokuan foltoren e Kuvendit duke mos lejuar Arbi Agalliun që të fliste në seancën plenare.
