Dy vajzat 16-vjeçare të raportuara si të larguara nga familja, mësohet se janë parë për herë të fundit në qytetin “Studenti”. Kanë qenë vetë familjarët që kanë denoncuar në polici zhdukjen pa adresë të 16-vjeçareve, të cilat janë shoqe me njëra-tjetrën dhe dyshohet të jenë larguar së bashku.
“Më datë 01.01.2021, shtetasja A. A dhe shtetasi L. H, kallzojnë se janë larguar nga banesa dhe nuk janë kthyer vajzat e tyre të mitura 16-vjeçare, shoqe me njëra-tjetrën. U bë shpallja në kërkim dhe punohet për gjetjen e tyre”, njoftoi policia.
Vajzat janë larguar nga banesat e tyre në kryeqytet mëngjesin e 1 janarit dhe nuk janë kthyer më, ndërsa familjet nuk kanë dijeni për vendodhjen.
Secila prej vajzave ka thënë se do të shkonte në shtëpinë e shoqes, por ndërsa prindërit i kanë telefonuar disa orë më pas, ka rezultuar se telefonët e tyre kanë qenë të mbyllur.
Mendohet se njëra prej tyre ka marrë një shumë parash që kishte mbledhur për festa dhe disa veshje e më pas është larguar nga banesa./Opinion.al
