Pas padisë së ngritur nga LSI lidhur me inceneratorin e Fierit, ka reaguar ish-sekretari i Përgjithshëm i Ministrisë së Mjedisit, Alqi Bllako, aktualisht deputet i Partisë Socialiste.
Për News 24 ai shprehet se nuk ka patur asnjë rol në procedurën e dhënies së konçensionit, ndërsa pohon se u takon organeve të drejtësisë të përcaktojnë nëse ka shkelje dhe cilët janë përgjegjësit.
“Jam njohur nëpërmjet medias me padinë e tretë apo të katërt për të njëjtën çështje, e cila rihidhet në treg me qëllimin e vetëm për të prodhuar zhurmë.
Pavarësisht pozicionit që kam mbajtur si Sekretar i Përgjithshëm pranë Ministrisë së Mjedisit, ligji për konçensionet dhe partneritetin publik-privat i ka fare qartë të përcaktuara rolet dhe detyrat e çdo institucioni të përfshirë në proçes apo titullar/anëtar të komisioneve përkatëse.
Duke shprehur besimin se kolegët e çdo institucioni kanë zbatuar rigorozisht ligjin, deklaroj me përgjegjësi të plotë se kam patur zero rol në çdo proçedurë vendimmarrëse për dhënien e këtyre konçesioneve direkt apo indirekt. Në çdo rast, ju përket vetëm organeve të drejtësisë të përcaktojnë nëse ka ose jo shkelje; dhe nëse po, cilët janë personat përgjegjës.
Sa i përket atyre që vazhdojnë të hedhin në treg akuza të tilla, mendoj se vetingu i politikanëve do t’i jepte njëherë e përgjithmonë fund kësaj tallje publike”, thekson ai.
Kujtojmë se për inceneratorin e Fierit LSI ka paditur Alqi Bllakon, së bashku me ish-ministrin e LSI Lefter KOka dhe kryebashkiakun e Fierit Armando Subashi./Opinion.al
