Një 86-vjeçare amerikane nga Marylandi, e prekur nga koronavirusi është nisur më 3 Mars nga Tirana drejt Stambollit, me destinacion përfundimtar SHBA-në. Lajmi u mësua krejt rastësisht pasi u bë me dije nga Ambasada Amerikane në Ankara, si dhe nga Ministri Turk i Shëndetësisë.
Ambasada e SHBA-së në Turqi bëri me dije se e moshuara nuk ka lëvizur në shtetin turk, por ka qëndruar në zonën e tranzitit në aeroportin e Stambollit. Ambasada po ashtu konfirmon se ajo ishte nisur nga Tirana drejt aeroportit ndërkombëtar, Dulles në SHBA.
Nga ana tjetër, Ministri i Shëndetësisë në Turqi, Fahrettin Koca, konfirmon të njëjtën teori por mohon lajmet se 86-vjeçarja kishte rezultuar pozitive pas vizitës në Turqi.
“Ajo nuk e vizitoi Turqinë. Më 3 Mars, mori një fluturim nga Tirana drejt Washingtonit, nëpërmjet Stambollit”, njoftoi ai në Twitter.
Këto komente vinë një ditë pasi guvernatori i Maryland, Larry Hogan tha se e prekura, e kishte mbartur virusin nga Turqia, vend që deri më tani nuk ka ende asnjë rast të konfirmuar me koronavirus.
Ajo që nuk dihet ende është pse e moshuara u nis nga Rinasi, prej sa kohësh qëndronte ajo në Shqipëri, dhe mbi të gjitha, ku e mori koronavirusin./Opinion.al
