Kreu i PD-së, Lulzim Basha ka reaguar pas akuzave të bëra gjatë ditës së sotme nga kreu i qeverisë, Edi Rama i cili u shpreh se shqiptarët janë përtacë dhe të pakualifikuar për punë. Me një reagim të tij në Facebook, Basha u shpreh se “Rama ka prioritet vetëm shpenzimet e luksit”.
Reagimi i Lulzim Bashës:
Shpunësuesi i mijëra shqiptareve, shkaktari për mbylljen e 80 mijë bizneseve, përgjegjësi për papunësinë që ka arritur zyrtarisht 18 për qind, por që në realitet është shumë më e lartë, akuzoi sot sërish popullin e vet se është dembel dhe i pashkollë.
Papunësia lidhet vetëm me rrënimin ekonomik, me taksat e larta, me krimin që sundon e mban larg investitorët, me korrupsionin pas çdo portë qeveritare, e për të gjitha këto përgjegjës është Edi Rama. Sot vetëm një kantier është në punë.
Vjedhja, zhvatja, plaçkitja. Sot në punë është vetëm Rama me oligarkinë e tij që në dy vjet ka futur në xhep 2.2 miliard euro. 88 milion dollarë tendera për 11 miqtë e tij. 90 milion dollarë shpenzime luksi. Ky është i vetmi prioriteti i Edi Ramës, jo të sigurojë punësim dhe mirëqenie për qytetarët.
