Një pjesë e qytetarëve që ishin bllokuar në pikën kufitare të Kapshticës kanë hyrë në Shqipëri por nuk janë lënë të ikin menjëherë në shtëpitë e tyre.
Një grup prej pothuajse 40 emigrantësh ndejtën rreth 4 ditë në tokë neutrale mes kufirit shqiptar dhe grek. Ata kërkonin të ktheheshin në Shqipëri pas shpërthimit të krizës së koronavirusit. Megjithatë, aksesi i tyre në Shqipëri u vështirësua pasi qeveria ka mbyllur kufijtë.
Megjithatë sot mësohet se 27 persona të cilët ishin bllokuar në kufi dhe që nuk ishin rezidentë në Greqi janë lejuar të hyjnë ndërsa të tjerët që janë rezident në Greqi duhet të kthehen.
Pas kalimit të kontrollit mjekësor, grupi i personave që u lejuan të hyjnë u transportuan në një hotel në Korcë ku do të qëndrojnë për 14 ditë në karantinë. Shpenzimet për ta do të mbulohen nga Këshilli Kordinues i Diasporës. Gjatë qëndrimit për 14 ditë në karnatinë, të gjithë personat do të jenë të monitoruar nga policia dhe pas përfundimit të këtij afati do të lejohen që të shkojnë pranë familjeve të tyre.
Kryeministri Rama tha sot e për ata që kanë emergjenca të ndryshme të cilat do të verifikohen, do të lejohet të futen në Shqipëri, por jo duke shkuar menjëherë pranë familjarëve të tyre. Ata do të duhet të karantinohen në një hotel pranë zonës kufitare dhe do të paguajnë vetë të gjitha shpenzimet. Nuk do të lejohet askush të dalë nga dhoma – tha Rama – pasi do të ketë polici në strukturat hoteliere. /Opinion.al
