Gjykata ka dhënë sot masën e arrestit me burg për Ragip Haxhiajdinin, një ndër të dyshuarit për grabitjen e Rinasit. Ai akuzohet për pjesëmarrje në grup të strukturuar kriminal, grabitje, armëmbajtje pa leje dhe vrasje të policëve e mbetur në tentativë.
Në gjyq, 50-vjeçari ka mohuar akuzat. Ai ka thënë se nuk ka lidhje me ngjarjen, por vëllain e Admir Muratajt e njeh prej 15 vitesh nga një takim në Gjermani.
“Unë nuk kam lidhje me ngjarjen. Unë njoh Aleksin (Aleksandrin), vëllain e Admir Murataj, e kam takuar në Gjermani rreth 15 vite më parë. Në shtetin shqiptar gjendem që prej muajit shtator 2018, pasi vëllai im ka blerë një objekt. Që nga muaji nëntor nuk kam dalë nga Shqipëria. Jam njohur me ngjarjen para një jave kur dëgjova emrin Daja. Unë jam i pastër, nuk kam lëvizur fare, kam hyrje-dalje familjare. Shkova dhe në varrimin e Admir Murataj bashkë me familjarët e mi që erdhën nga Kosova. Në Tiranë gjatë kësaj periudhe kam qenë vetëm një herë për të blerë pajisje. Jam i gatshëm të vendos para drejtësisë dokumente dhe të ardhurat e mia familjare, dua të ballafaqohem me personin që më akuzon. Në qoftë se organi i akuzës më gjen një provë te vetme jam i gatshëm të rri në burg për jetë. Jam pyetur edhe dy vite më parë për një grabitje të mëparshme. Dhe dola i pafajshëm s’pati asnjë provë, në qoftë se unë do isha person i dyshuar pse nuk më mbajti shteti shqiptar nën vëzhgim. Pse nuk e hetoni Bengasin , me çfarë kam lexuar ai jetonte në një apartament 150 m2, si më arrestoni thjesht me deklarimet e tij? Ditën e ngjarjes kam qenë duke drekuar në Kavajë bashkë me 5 shokë. Merrni kamerat e sigurisë, është krejt e vërtetueshme se ku isha e ç’bëja”, ka thënë ai./Opinion.al
