Gjykata e Tiranës ka dhënë masën e sigurisë “Arrest në burg” për dy të arrestuarit, Ervis Bakallin dhe Dorian Kalon, për depon e armëve në Yzberisht.
Dy ditë më parë, Policia publikoi pamjet e operacionit të koduar “Silent”, falë së cilit u zbulua një bazë ku prodhoheshin silenciatorë dhe modifikoheshin armët e zjarrit. Si rezultat janë sekuestruar arsenal armësh të llojeve pistoletë e kallashnikov, silenciatorë, municion luftarak, pjesë të ndryshme armësh etj.
Baza në fjalë ndodhej në zonën e Yzberishtit, ndërsa policia tha se dy personat janë kapur duke punuar për modifikimin e armëve në një banesë në pronësi të Elvis Bakallit në zonën e Mëzezit.
Sipas policisë, të rinjtë siguronin armë nga persona me të shkuar kriminale dhe dyshohet se më pas ato shiteshin te grupet kriminale me qëllim përdorimin e tyre në krimet kundër personit./Opinion.al
