Kryeministri Dritan Abazovic ka reaguar për operacionin e kryer në doganën malazeze, ku u sekuestruan 300 kg kanabis në një kamion me paleta druri që u fut nga Shqipëria.
Abazovic tha se veprimet e koordinuara të zbatuara në vazhdimësi nga Drejtoria e të Hyrave dhe Doganave (UPC) dhe Drejtoria e Policisë (UP) kanë dhënë rezultate të dukshme.
Përmes një postimi në rrjete sociale, ai shkruan se krenohet me rezultatet e drejtorisë së doganave dhe të policisë.
“Zyrtarët e Drejtorisë së të Hyrave dhe Doganave, mëngjesin e sotëm kanë gjetur një sasi të madhe droge në hapësirën e ngarkesave të TMV-së. Ngarkesa e lartpërmendur është siguruar me vulë doganore, por zyrtarët e UPC-së, përmes analizës së rrezikut dhe punës së inteligjencës, e veçoi për inspektim dhe bëri një vepër që meriton të gjitha lavdërimet”, tha ai.
Ai shtoi se Mali i Zi “kësisoj u bë një vend që është në krye të vendeve evropiane kur bëhet fjalë për konfiskimin e drogës dhe shtypjen e aktiviteteve të karteleve të drogës në lidhje me transportin total të ngarkesave që ndodh nëpër territorin tonë”.
“Urime drejtorit të UPC-së, Vladimir Bulajiq dhe bashkëpunëtorëve të tij, drejtorit të UP-së, Nikola Terziq, ndihmës drejtorit për krimin e organizuar dhe kreut të SPO-së Predrag Shuković dhe njerëzve të tjerë në sektorin e inteligjencës dhe sigurisë që mbrojnë çdo ditë interesat kombëtare të Malit të Zi”, tha Abazovic.
