Detaje të tjera janë zbuluar nga operacioni antidrogë që u krye ditën e hënë nga Guardia di Finanza dhe Policia e Vlorës në detin Jon, ku u sekuestruan 992 kg kanabis, i paketuar në 153 thasë.
Sipas mediave italiane të dielën e 7 gushtit, një helikopter shqiptar, gjatë një shërbimi patrullimi bregdetar, vuri re tre varka, 13 milje larg bregdetit shqiptar, nga të cilat janë transportuar thasët e marijuanës.
Po ashtu mediat italiane shkruajnë se tre skafet që drejtoheshin nga vlonjatët Arbër Saraseli, Saverjo Imeraj dhe Qemal Pekmezi kanë qenë gjatë gjithë kohës në ruajtje nga ajri nëpërmjet helikopterit, teksa dy prej tyre u kapën në det në momentin e shkëmbimit, ndërsa skafi i tretë u gjet në portin e Triportit. Më pas policia shqiptare arrestoi tre persona, ndërsa një tjetër u shpall në kërkim.
Rreth orës 11.00 u konfirmua se varka me vela e quajtur “Scarabeo” nuk kishte asnjë flamur lundrimi, për këtë arsye, pasi mjetet e GDF arritën kufirin e ujërave territoriale italiane, u vendos nisja e një hetimi për flamurin në anije, në përputhje me rregulloret ndërkombëtare, për të përcaktuar nëse anija i përket ndonjë shteti. Në këtë moment oficerët kanë hipur në anije dhe gjatë kontrollit kanë zbuluar drogë dhe para.
Në përfundim të operacioneve, anija “Scarabeo” u shoqërua në portin e Galipolit për një kontroll më të thelluar dhe, pas përfundimit të kontrolleve të mëpasshme, mjeti lundrues u sekuestrua. Ndërkohë u gjetën 992 kg marijuanë, dhe dy celularët e kapitenëve ukrainas që ishin në bordin e saj.
Operacioni nga Guardia di Finanza zgjati rreth 24 orë, varka me vela u konstatua se ishte në pronësi të një personi tjetër me kombësi ukrainase, por që nuk kshte të bënte me vjedhjen.
Hetuesit po punojnë për të kuptuar se ku ishte destinacioni, por sipas të gjitha gjasave, nisur nga drejtimi i lundrimit, supozohet se duhet të ishte ndalur në Pulia. Ndërsa, u gjetën edhe disa kanaçe karburanti, ndoshta me qëllim ndryshimin e drejtimit në rast nevoje./Opinion.al
