Autoritetet afgane kanë konfirmuar se ka qenë një futbollist, personi që ra nga avioni ushtarak amerikan pasi u kap në rrotat e tij në tentativë për tu larguar nga vendi që tashmë ndodhet nën regjimin e egër të talebanëve.
BBC shkruan se Zaki Anwari, 19 vjeç, kishte luajtur për ekipin kombëtar të të rinjve të Afganistanit.
Humbja e jetës së Anwarit është konfirmuar edhe nga Drejtoria e Përgjithshme e Sportit përmes një postimi në ‘Facebook’.
“Mësuam me keqardhje të madhe që Zakia Anwari, një nga lojtarët e ekipit kombëtar të futbollit të të rinjve, vdiq në një aksident tragjik. I ndjeri Anëari, mes qindra të rinjve që donin të largoheshin nga vendi, u rrëzua nga një aeroplan ushtarak amerikan dhe ndërroi jetë”, shkruan drejtoria e Përgjithshme e Sportit.
Që nga rimarrja e Afganistanit nga talebanët, mijëra njerëz janë grumbulluar në aeroportin e Kabulit ndërsa vendet perëndimore nxitojnë të evakuojnë qytetarët e tyre dhe bashkëpuntorët afganë.
Imazhet e publikuara të hënën në mediat e huaja treguan qindra njerëz që vraponin përkrah një aeroplani të forcave ajrore amerikane për tu larguar nga vendi. Disa njerëz u panë të kapur në anë të tij.
Raportet e mediave lokale thanë se të paktën dy persona vdiqën pasi ranë nga avioni që u ngrit në fluturim. Forcat ajrore amerikane kanë konfirmuar gjithashtu se mbetje njerëzore u gjetën në motorrin e një avioni pasi mbërriti në Katar./Opinion.al
