Aktori i njohur i Hollywood, Tom Hanks dhe bashkëshortja e tij Rita Wilson, kanë dalë nga spitali australian, ku u kuruan për koronavirus. BBC raporton se dyshja ndodhen në vetkarantim në shtëpinë e marrë me qera në Queensland.
Aktori 63-vjeçar dhe gruaja e tij njoftuan në Instagram të enjten e kaluar se ishin infektuar me virusin e rrezikshëm.
“Ndiheshim pak të lodhur, sikur kishim ftohtë dhe dhimbje trupi. Rita pati disa dridhje, që shkonin e vinin. Edhe ethe të pakta,” tha ai në postim.
Më vonë Hanks shkroi një mesazh tjetër, duke rrëfyer se ndiheshin më mirë dhe falenderuan stafin për përkujdesjen. Aktori falenderoi po ashtu edhe fansat për lutjet, dashurinë dhe mbështetjen.
“Përshëndetje njerëz. Rita dhe unë duam t’i falenderojmë të gjithë ata që po kujdesen për ne këtu në Australi. Kemi Covid-19 dhe jemi izoluar që të mos ua ngjisim të tjerëve. Për disa, sëmundja mund të ketë pasoja serioze. Ne po e marrim hap pas hapi. Po ndjekim këshillat e ekspertëve dhe po kujdesemi për veten për ta kaluar.”, shkruan Hanks.
Aktorët ndodheshin në Australi për fazat e para të produksionit të një filmi nga Warner Bros, mbi jetën e Elvis Presley-t ku Hanks do të luajë menaxherin e aritstit, Colonel Tom Parker.
Mësohet se Tom dhe Rita e morën virusin nga një anëtar i stafit që ishte diagnostikuar më parë./Opinion.al
