Nëna e Xhino Koçës, djalit që u hodh nga kati i tretë i spitalit “Shefqet Ndroqi”, teksa ishte i infektuar me COVID-19, përmes një statusi në rrjetet sociale njoftoi se do të organizojë një festë ndryshe për 30 vjetorin e Xhinos.
Stilistja e njohur Lira Koça shkruan në “Instastory” se data 5 mars është një nga datat e shënuara për familjen pasi bëheshin gati për të festuar ditëlindjen e të voglit të shtëpisë.
Kështu në 30-vjetorin e të birit familja do të gjejë një mënyrë për ta ndjerë atë sadopak afër. Lira Koça shkruan se 30 pëllumba dhe 30 tullumbace do të lëshohen në qiell në simbol të përqafimit për Xhinon.
“Data 5 Mars është një nga datat e shënuara për familjen tonë. Çdo prag 5-Marsi ne bëheshim gati të festonim ditëlindjen e të voglit të shtëpisë Xhinos. Këtë vit është ditëlindja e 30-të e djalit tonë. 30 pëllumba dhe 30 tullumbace të bardhë do të lëshohen drejt qiellit duke u kthyer në simbol të përqafimit tonë për Xhinon. Më 5 Mars ora 17:00 tek sheshi përpara Sfinksit dju që do të keni dëshirë të merrni pjesë në këtë përvjetor të Xhinos jeni të mirëpritur.
Familjarë dhe të afërm, miq e të njohur, të gjithë bashkë në këtë ditëlindje ndryshe. Për të zvogëluar sadopak distancën që mungesa fizike e Xhinos na bën të jetojmë. Përgjithmonë me ne Xhino”, shkruan ajo.
Xhino Koça u hodh nga ballkoni i katit të tretë të spitalit COVID-2 në Tiranë ku u shtrua pasi u prek nga koronavirusi, duke gjetur vdekjen.
