Policia ka zbuluar dinamikën e ngjarjes tragjike të ndodhur ditën e djeshme, ku u mbyt në Durrës 18-vjeçari Anri Kashiku, i cili u fut në det për të shpëtuar vëllain dhe shokun e tij.
Në një njoftim për mediat bëhet me dije se roja bregdetare ka vendosur flamurin e kuq që ndalon hyrjen në det të plazhistëve për shkak të dallgëzimit të lartë, e megjithatë fëmijët kanë hyrë, duke rrezikuar jetën e tyre.
Fëmijët i kanë kërkuar ndihmë një shtetasi që po lundronte me varkë dhe menjëherë në ndihmë të tyre kanë shkuar dhe vëllai i njërit prej fëmijëve dhe roja bregdetare. Ndërkohë policia bën me dije se fëmijët e mitur janë arritur të shpëtohen ndërkohë që 18-vjeçari nuk ka mundur të dalë pasi dallgëzimi ishte i lartë.
DVP Durrës/Sqarim
Në lidhje me ngjarjen e ndodhur ditën e djeshme, në Sektorin Rinia, Durrës, ku humbi jetën shtetasi A. K., 18 vjec, i cili u fut në det, për të shpëtuar dy fëmijë të mitur dhe vëllain e tij, sqarojmë se:
Në vijim të veprimeve hetimore të kryera nën drejtimin e Prokurorisë pranë Gjykatës së Rrethit Gjyqësor Durrës, për sqarimin e rrethanave të kësaj ngjarjeje, ka rezultuar se roja bregdetare, shtetasi I. Sh. e kishte vendosur sipas rregullores flamurin e kuq, shenjën paralajmëruese për të mos u futur në det, pasi dallgëzimi ishte i lartë.
Pavarësisht kësaj, fëmijët janë futur në det, duke rrezikuar jetët e tyre.
Pas disa minutash, të miturit i kanë kërkuar ndihmë një shtetasi që po lundronte me një varkë me pedale, afër tyre.
Për të ndihmuar fëmijët, në det janë futur edhe roja bregdetare dhe shtetasi A. K., vëllai i njërit prej të miturve.
Pas ndihmës së dhënë, fëmijët janë nxjerrë në breg, nderkohe qe 18-vjeçari A. K. nuk ka mundur të dalë dot pasi është mbytur për shkak të dallgëve të larta.
Nga ana e punonjësve të Policisë të DVP Durrës dhe DVKM Durrës është ndërhyrë menjëherë dhe pas rreth 50 minutash është gjetur dhe nxjerrë nga uji, trupi i pajetë i shtetasit A. K.
Në drejtimin e Prokurorisë pranë Gjykatës së Rrethit Gjyqësor Durrës vijon puna për dokumentimin e plotë të rrethanave të kësaj ngjarjeje.
