Dy policë të Patrullës së Përgjithshme të Stacionit të Policisë Shëngjin u pezulluan pasi dyshohet se kanë marrë para gjatë ndalimit të automjeteve.
Hetimi për dy policët mësohet se ka nisur pas publikimit të një video në rrjete sociale ku inspektorët të dy punonjës së Patrullës së Përgjithshme në stacionin e policisë në Shëngjin u filmuan duke përfituar para në mënyrë të paligjshme gjatë ndalimit të automjeteve.
Menjëherë pas publikimit të kësaj video-je, është bërë identifikimi i 2 punonjësve të Policisë që shfaqen në të, konkretisht inspektor A. Ç. dhe inspektor K. Ll., punonjës të Patrullës së Përgjithshme të Komisariatit të Policisë Lezhë, të caktuar përkohësisht si punonjës të Patrullës së Përgjithshme të Stacionit të Policisë Shëngjin.
Të dy këta punonjës policie janë pezulluar menjëherë nga drejtori i Drejtorisë Vendore të Policisë Lezhë dhe ndaj tyre Drejtoria e Standardeve Profesionale në Policinë e Shtetit, ka nisur hetim administrativ, për shkelje të rëndë të procedurës standarde të punës, gjatë kryerjes së detyrës.
