Ministria e Drejtësisë ka dërguar për procedim penal dy punonjës të burgut Peqin të cilët përgatitën dosjen për miratimin e dhënies së lejes të burgosurit Artan Koçeku, i cili më pas e shfrytëzoi këtë leje për të vrarë në Shkodër shtetasin Angjelin Shkami. Vrasja ndodhi më 17 dhjetor në afërsi të fshatit Grudë, ndërsa Artan Koçeku pas vrasjes vazhdon të jetë në arrati. Koçeku po vuante dënimin në burg pasi në vitin 2013 bashkë me persona të tjerë i kishte vendosur eksploziv makinës së një efektivi të policisë. Shkak për ekzekutimin e Angjelin Shkamit mësohet se është bërë një borxh prej 30 mijë eurosh të cilat viktima ka refuzuar tja kthejë, ndaj dyshohet se ky ka qenë edhe shkaku që Koçeku e qëlloi me tre plumba në kokë në makinën e tij.
