Një punonjës i ndërmarrjes komunale në Bashkinë e Patosit ka denoncuar sot në polici shefin të cilin e akuzon për dhunë.
Në një deklaratë për mediat Bato Dalipaj ka rrëfyer dhe arsyen pse përgjegjësi i ndërmarrjes Petrit Pëllumbi ka ushtruar dhunë fizike ndaj tij.
Dalipaj pretendon se shefi i ka kërkuar të nënshkruaj një formular me emrat e familjarëve të tij si vota të sigurta për kryetaren socialiste të bashkisë.
Në momentin që punonjësi nuk ka pranuar të nënshkruaj formularin, atëherë Petrit Pëllumbi e ka goditur disa herë me grushte.
Ai i është drejtuar komisariatit ku edhe ka bërë denoncimin. Bashkë me të ka qenë edhe deputeti Luan Baçi, i cili i ka bërë thirrje ambasadës amerikane dhe misioneve ndërkombëtare që të ndalohen këto fenomene gjatë fushatës elektorale.
“Punoj 4 orarësh në komunale prej 10 muajsh. Petrit Pëllumbi në zyrë përgjegjës më kërkoi të shkruaja pjestarët e familjes në një formular për zgjedhjet. Unë nuk e firmosa pasi nuk jam 8 orarësh në punë.
Erdhi nga pas më kapi nga supi dhe më goditi me 3 a 4 grushta dhe i gjakosur rash përtokë.
Më çuan në spital drejtori i ndërmarjës Artjoli s’bëra denoncim i thashë rash, gabimi im. Shkova në shtëpi tani u enjta dhe vendosa të bëj denoncim në polici”-tha Dalipaj.
Më herët policia reagoi për ngjarjen dhe tha se po vijojnë hetimet për zbardhjen e saj.
