Policia e Rinasit ka arrestuar një person të shpallur në kërkim ndërkombëtar për vrasje.
Burimet nga policia thanë se ai është Alfred Rrasa, një 22-vjeçar nga Shkodra, i cili ishte kthyer si i deportuar nga autoritetet kroate.
Policia tha se pas krahasimit të fotove me personin dhe shpjegimeve konfuze që jepte, rezultoi se ishte Rrasa, ndërsa të dhënat në dokumentin e kalimit ishin të vëllait të tij.
“22-vjeçari ishte shpallur në kërkim ndërkombëtar pasi Gjykata e Cuneos, në Itali, me vendim të datës 7 gusht 2017 e ka shpallur në kërkim ndërkombëtar për veprat penale “Vrasje, e vrasje e mbetur në tentativë” dhe “Mbajtja pa leje e armëve të zjarrit”, sqaron policia në një njoftim të sajin.
Maksimumi i mundshëm i dënimit për këto vepra është burgim i përjetshëm.
