Është zbardhur dëshmia e Kabil Hundës, i cili akuzohet se ka përdhunuar vajzën e nipit të tij, vetëm 16 vjeçe. Sipas “A2”, 53-vjeçari është arrestuar mbrëmjen e djeshme nga Policia e Gjirokastrës, dhe se shoqërimi i tij në komisariat është bërë me forcë.
Hunda ka kërkuar nga punonjësit e policisë që t’i thonë arsyen e arrestimit. Mësohet se ai është marrë në pyetje rreth orës 23:30 dhe në momentin që i është komunikuar akuza ka filluar të bërtasë dhe të replikojë me oficerin e policisë gjyqësore.
Ai ka mohuar të gjitha akuzat e ngritura për përdhunim sistematik nga 16-vjeçarja.
“Nuk janë të vërteta akuzat, nuk dëshiroj të jap asnjë lloj shpjegimi për këtë ngjarje të montuar, por do të shprehem në një moment të dytë”,-mësohet të ketë thënë Hunda.
Marrja në pyetje është ndërprerë disa herë për shkak të gjendjes tepër të renduar të 53-vjeçarit, i cili në një moment i ka rënë murit me kokë. Pas refuzimit të dhënies së shpjegimeve të tij, dosja hetimore nuk është dorëzuar ende në organin e akuzës, pasi pritet të plotësohet edhe me dy dëshmi të tjera./Opinion.al
