Ish-ministri i Mjedisit Lefter Koka u arrestua sot nga Prokuroria e Posaçme, për çështjen e inceneratorëve. Sipas raportimeve Koka, akuzohet për shpërdorim detyre dhe korrupsion. Urdhër-arresti për të u firmos nga prokurorët Dritan Premci dhe Vladimir Mara.
Por si nisën akuzat ndaj Lefter Kokës? Ka qenë Partia Demokratike që dorëzoi në SPAK kallëzimin penal për inceneratorët ku mes funksionarëve të lartë të denoncuar ka qenë dhe emri i Lefter Kokës.
Kallëzimi u bë për veprat penale: “Shpërdorim detyre”, “Shkelje e barazisë në tendera apo ankande publike”, si dhe “Krijimin e grupit të strukturuar kriminal”, ndërsa u kërkua edhe pezullimi i ushtrimit të detyrës publike ndaj tij.
Por edhe kryetarja e LSI, Monika Kryemadhi depozitoi kallëzim penal në SPAK për ish-drejtuesit e Ministrisë së Mjedisit në lidhje inceneratorin e Fierit.
Krahas ish-ministrit të mjedisit Koka, u padit edhe ish-Sekretari i Përgjithshëm i kësaj ministrie, Alqi Bllako si edhe kryebashkiaku i Fierit, Armando Subashi.
Sipas kësaj partie, të tre ata duhet të japnin llogari për shkeljet e kryera gjatë miratimit të lejes për ndërtimin e inceneratorit të Fierit. Padia u dorëzua në SPAK nga vetë kryetarja e LSI, Monika Kryemadhi.
Ndërkohë ish-ministri i Mjedisit, Lefter Koka, iu përgjigj kryetares së LSI, Monika Kryemadhi, duke thënë se falenderon thellësisht llogaritare Monën, e cila sipas tij nuk kupton as vetë se çfarë flet.
“Falenderoj thellësisht llogaritare Monën (e cila në fakt nuk kupton se çfarë foli) që me letra dhe fakte i tregoi publikut dhe çdo shqiptari, se qeveria shqiptare ka çdo kapacitet dhe aftësi të ndjekë e zbatojë me rigorozitet procedura sipas manualeve dhe standardeve ndërkombëtare!
E dashur llogaritare Mona! Mos u bezdis! 25 Prilli do të vijë më shpejt dhe më furishëm nga sa ju pandehni!”, shkruan Koka.
Ish-ministri i ka mohuar vazhdimisht akuzat ndaj tij duke theksuar se bëhen për qëllime të pastra politike.
SPAK ka ngritur ndaj Kokës akuzat për shpërdorim detyre, pastrim parash dhe korrupsion./Opinion.al
