Ministria e Shëndetsisë ka njoftuar për gjendjen e efektivit të policisë, i cili mbeti i dëmtuar mbrëmjen e djeshme në protestën e zhvilluar për vrasjen e 25-vjeçarit, Klodian Rasha.
Sipas Minisitrisë, efektivi i është nënshtruar një ndërhyrjeje kirurgjikale në sy dhe pritet të futet sërish në sallën e operacionit, për një tjetër ndërhyrje.
“Prognoza e efektivit 36-vjeçar me iniciale F.A është mjaft e rëndë”, thotë Ministria e Shëndetësisë.
Ndërkohë, sipas njoftimit të Ministrisë 15 efektiv të policisë kanë lënë spitalin pas mjekimit të marrë.
Deklaratë e plotë:
Ministria e Shëndetësisë dhe Mbrojtjes Sociale informon se, gjatë mbrëmjes së djeshme, deri pas mesnate, kanë marrë shërbim në spitalet universitare të Tiranës 16 të lënduar në protestën e dhunshme të zhvilluar në Bulevardin “Dëshmorët e Kombit”.
Janë trajtuar 16 punonjë të policisë dhe dy protestues, ku njëri prej punonjësve të rendit ka dëmtime serioze të syrit.
Gjatë mbrëmjes së djeshme, punonjësi i policisë me inicialet F.A., 36 vjeç, i është nënshtruar ndërhyrjes së parë kirurgjikale, në shërbimin e Okulistikës, pas dëmtimit të rëndë në sy.
Referuar mjekëve që kryen ndërhyrjen, 36 vjeçari do t’i nënshtrohet një ndërhyrje të dytë, por prognoza është mjaft e rëndë.
Ndërsa të lënduarit e tjerë kanë lënë spitalin, pas trajtimit mjekësor./ Opinion.al
