Irfan Domnori është liruar nga burgu i Podgoricës.
Domnori u nis drejt Malit të Zi për të marrë pjesë në një ekspozitë të një piktori shqiptar por u arrestua më 27 Dhjetor dhe u dënua me 10 ditë burg në Podgoricë. Arrestimi i tij solli mjaft reagime pasi familjarët nuk ishin njoftuar për ndalimin e tij, dhe e shpallën të zhdukur.
Kjo është hera e dytë që Domnori dënohet nga Mali i Zi. Në muajin nëntor, 64-vjeçari u dënua me 300 euro gjobë si dhe u dëbua për një muaj nga autoritetet e vendit fqinj për shkak se valëviti flamurin shqiptar në Ditën simbolike të Gështenjës në Krajë gjatë një festimi tradicional ku morën pjesë një numër i madh qytetarësh nga Mali i Zi, por edhe nga Shkodra.
Kujtojmë se Irfan Domnori u bë i njohur disa vite më parë pasi pas një aksidenti mjekët i thanë se do ta kalonte pjesën tjetër të jetës në një karrige me rrota. Ai jo vetëm që u ngrit në këmbë, por sot është një sportist që merr pjesë rregullisht në garat e vrapimit në të gjitha trojet shqiptare me uniformën e tij tradicionale.
4 vite më parë, shkodrani u cilësua nga mediat serbe si “Terroristi Shqiptar i maleve” për shkak se merrte pjesë edhe në ngjitjen e maleve përkrah grupeve alpiniste por gjithmonë me veshje kombëtare, plis dhe flamuri kuqezi./Opinion.al
