Shqipëria mund të marrë një “po” për negociatat në Mars ka deklaruar ish-kryeministri Berisha duke shtuar se kjo do të vijë nën një procedurë speciale të imponuar nga Shqipëria.
Në një intervistë televizive, Berisha tha se ishte faji i kësaj qeveria që negociatat nuk ishin hapur.
“Nëse ka një projekt që shqiptarët e kishin ëndërr ishte ‘Shqipëria si Europa, Shqipëri në BE’, këtë projekt e shkatërroi Edi Rama përfundimisht. Edi Rama akuzon poshtë e përpjetë presidentin Macron, por përveç këtij viti ku ai doli haptaz se Shqipëria nuk meriton dhe janë 15 vende që thonë se Shqipëria nuk e meriton, Presidenti Macron, Franca nuk ka nxjerr asnjë pengesë konkrete. Pra, Edi Rama humbi rastin në 2015 se e mbushi vendin me drogë, humbi rastin në 2016 se filloi kokaina, humbi rastin në 2017 se shkatërroi shtetin ligjor, la vendin pa gjykata. A mund të imagjinoni një vend që pretendon të hapë negociatat kur nuk ka Gjykatë Kushtetuese dhe Gjykatë të Lartë”, tha ai.
Për Berishën, Shqipëria u bë shkaku që BE të reformojë procesin e zgjerimit. Ai deklaroi se në mënyrë të vazhdueshme qeveria Rama ka dorëzuar raporte të gënjeshtërta në Bruksel. Për pasojë, Berisha thotë se dëmi është i pakthyeshëm dhe Shqipëria mund të marrë një “po” por ajo nuk do të jetë më si më parë dhe do të zhvillohen nën një procedurë speciale.
“A do hapen? Jo nuk hapen kurrë ashtu sic ishin, është dëm i parikthyeshëm. Nëse më pyesin sot mundësitë janë më të pakta për t’u integruar pas 20-25 viteve se sa për të mbetur jashtë fare. Pse? Negociatat si parim do hapen, por me procedurën speciale që imponoi Shqipëria, sepse bëhen raporte gënjeshtër mbi gënjeshtër dhe erdhi dikur ‘mjaft është mjaft’ thanë këto raporte s’i besojmë më, kjo është e gjithë historia, dhe u bë Shqipëria shkaku që të reformohet procedura e zgjerimit, dhe në mars mund të thuhet PO, por ai do jetë një horizont që pa ndryshimet dramatike të rëndësishme në vend Shqipëria s’do ta kap më”, deklaroi Berisha. /Opinion.al
