Merr fund historia e përplasjeve në lidhje më pronësinë e shtëpisë pranë shkollës “Petro Nini Luarasi”, në Tiranë. Ditë më parë, ndërhyrja e përmbaruesve për të nxjerrë nga banesa familjet që jetonin aty, prodhoi skena të dhimbshme.
Para se të niste përplasja, ku u përfshi edhe Policia e Shtetit, mes palëve ka pasur një marrëveshje të bërë në vitin 2015 para noterit, ku banorët binin dakord se do të merrnin apartamente në këmbim të sipërfaqeve që zotëronin, mbi të cilat do të ndërtohej një pallat i ri.
Kjo marrëveshje iu kishte mundësuar edhe familjes pronare që të regjistrojë pronën në hipotekë, e nga ana tjetër të vërë në lëvizje Përmbarimin ndaj banorëve. Për këtë konflikt “kurban” u bë dhe drejtori i policisë së Tiranës, të paktën kështu u tha nga Ministri i Brendshëm, Sandër Lleshaj.
Këtë të premte avokati i familjarëve, Klodian Reçi tha për Opinion.al se është arritur një marrëveshje mes palëve.
“Palët u sqaruan me njëri-tjetrin. Kreditori (pronari i tokës) Aleksandër Gavoci, hoqi dorë nga detyrimi sipas vendimit të gjykatës, familjarët morrën përsipër të bëjnë lirimin e banesës vullnetarisht, pa ndërhyrjen e përmbarimit. Si kompensim Aleksandri ka vendosur që t’ju jap dy apartamente, një për familjen Dervishi dhe një për familjen Vataj. Apartamentet janë parë nga ana e familjeve, kanë rëndë dakord dhe ka vetëm disa modalitete që do të bëhen në ditët në vijim”, kA thënë për Opinion.al, avokati Klodian Reçi./Opinion.al
