Ndalimi i tij ishte një nga lajmet më të bujshme disa muaj më parë, pasi për herë të parë një personazh sportiv shumë i njohur në Shqipëri arrestohej në akuzën për trukim të ndeshjeve në bashkëpunim me një grup të strukturuar kriminal.
Por sot Apeli i Krimeve të Rënda vendosi që ti japë lirinë Armir Grimaj, ish-trajner i Kombëtares së Femrave dhe ish-zyrtar i ekipit të Vllaznisë së Shkodrës.
Grimaj u arrestua në fund të shtatorit të kaluar gjatë një aksioni policor që goditi bandën e Bajrajve në Shkodër pasi u kap në përgjime teksa ndërhynte për tolerime në një ndeshje kampionati.
44 vjeçari e apeloi vendimin e dhënë nga Gjykata e Krimeve të Rënda që e la në masën e arrestit me burg.
Ndërkohë që sot Apeli vendosi që Grima të hetohet në masën e arrestit shtëpiak.
Zbulimi
Grimaj u kap rastësisht nga përgjimet telefonike.
Pas sinjaleve të mbërritura nga autoritetet belge dhe holandeze, Prokuroria e Krimeve të Rënda kishte vënë në përgjim prej 6 muajsh Safet Bajrin si koka e dyshuar e një grupi të struktuar kriminal që shtrinte aktivitetin kriminal në Shkodër dhe jashtë Shqipërisë, kryesisht në trafikimin e lëndëve narkotike, pastrimit të parave, gjobëvënieve etj.
Gjatë përgjimit, Safet Bajri ka biseduar në telefon me Armir Grimajn që ky I fundit të ndërhynte për të paracaktuar rezultatin e një takimi në kategorinë inferiore.
