Lirohet nga burgu Albert Tuci, vëllai i kreut të bashkisë Fushë-Arrëz, Fran Tuci, që u arrestua në muajin qershor gjatë një operacioni anti-drogë.
Gjykata e Kukësit vendosi të ndryshojë masën e sigurisë në “arrest shtëpie” pas kërkesës së avokatëve të Tucit. Albert alias Arben Tuci pretendon se vuan nga një sëmundje e rëndë në pankreas dhe se para pak ditësh, një nga anëtarët e familjes së tij, kishte ndëruar jetë dhe për këtë, nevojitej që të qëndrojë pranë bashkëshortes dhe fëmijëve në kushtet e “arrestit shtëpiak”.
Vëllai i kryebashkiakut ra në prangat e policisë në qershor gjatë operacionit “Shën Mëri 2020”. Në këtë çështje penale janë arrestuar dhe marë të pandehur 23 persona që u ndaluan në muajin Maj të këtij viti.
Kjo çështje penale ka të bëjë me kultivimin e parcelave të mëdha me kanabis në zonën e Kukësit me ndihmën e policisë. Në dosjen hetimore thuhet se efektivët i lejonin kultivuesit e drogës të mbillnin parcelat me hashash, duke i garantuar mbrojtje nga policia, kur kjo e fundit shkonte në teren për të monitoruar sipërfaqet e mbjella me drogë.
Të pandehurit kryesorë të kësaj çështje janë Kreshnik Murataj, Beqir Murataj, Arben Tuci, vëllai i bashkiakut të Fushë-Arrëzit, Fran Tuci, Sali Kovaçi pronar parcele, si dhe disa punëtorë e transportues droge, por dhe tre efektivë të policisë së Kukësit si Arben Kalaja, Ramiz Cena dhe Naim Kadiu./ Opinion.al
