Mbrëmjen e sotme u arrestua nga SPAK kryebashkiaku i Bulqizës Lefter Alla. Sipas portalit Xungël.al, akuzat e SPAK e lidhin kryebashkiakun Alla me abuzime me tendera dhe korrupsion, për të cilat do të duhet të përgjigjet para prokurorëve të organit të lartë gjyqësor.
Por kush është Lefter Alla?
Emri i tij u bë mjaft i njohur për publikun kur u lakua në media në lidhje me një video të publikuar nga gazetari Artan Hoxha, ku shfaqej duke thithur kokainë.
Asokohe Prokuroria e Posaçme kundër Krimit të Organizuar dhe Korrupsionit nisi hetimet ndaj kryebashkiakut, ndërsa ky i fundit madje u thirr për të dëshmuar edhe në SPAK.
Vetë kryebashkiaku reagoi pas lajmeve të publikuara dhe akuzave të opozitës të cilat i cilësoi videomesazh.
“Dua të sqaroj gjithashtu se ekzistenca e një video-montazhi më është bërë me dije prej rreth një viti, por gjithmonë kam besuar dhe besoj se duhet të jetë drejtësia ajo që ta hetojë dhe ta zbardhë”.
“Kushdo që më akuzon mua të presë veprimet e Prokurorisë dhe vendimin përkatës të Gjykatës”, thotë Alla.
Në kuadër të hetimit, kryebashkiaku iu nënshtrua dhe testit të drogës, prej nga rezultoi se ai nuk ishte përdorues i lëndëve narkotike. Prokuroria urdhëroi gjithashtu dhe ekspertimin teknik të videos ku pretendohej se shfaqej Alla.
