Një 23-vjeçar në Tiranë është prangosur dhe do të përballet me 5 vepra penale vetëm se nuk iu bind urdhërit të policisë për të ndaluar, pasi kishte kaluar me semafor të kuq. I arrestuari është Renald Canaj. Ai ka shkelur rregullat e qarkullimit, duke kaluar me semafor të kuq tek Rruga e Kavajës dhe policia i ka bërë shenjë të ndalojë, por i riu i ka dhënë gaz makinës duke u larguar nëpër rrugica. Forcat “Shqiponja” janë vënë në ndjekje të tij. Në ikje e sipër, ai ka 3 makina, duke u akuzuar për shkatërrim prone dhe në fund ka sulmuar edhe fizikisht efektivët e Policisë, duke i goditur me grushte.
Në deklaratën zyrtare të policisë, sqarohet se shërbimet e Policisë së Komisariatit Nr.2 arrestuan në flagrancë shtetasin Renald Canaj, 23 vjeç, banues në Tiranë. Ky shtetas, në Rrugën e Kavajës, ka kaluar me semafor të kuq dhe pasi i është dhënë shenja e ndalimit nga shërbimet e Policisë, nuk ka ndaluar, por ka vazhduar lëvizjen me mjet, duke u shkaktuar dëme dhe tri mjeteve të tjera dhe pas ndjekjes nga shërbimet e Policisë është bërë ndalimi i mjetit në zonën e “Komunës së Parisit”, ku dhe është bërë arrestimi në flagrancë i këtij shtetasi.
Materialet iu referuan Prokurorisë së Tiranës në ngarkim të shtetasit të lartpërmendur për veprat penale: “Shkatërrim prone”, “Goditja për shkak të detyrës”, “Mosbindja ndaj urdhrit të punonjësit të rendit publik”, “Largimi nga vendi i aksidentit”, “Prishja e qetësisë publike”, parashikuar nga nenet 150, 237, 242 273 dhe 274 të Kodit Penal.
