Kandidati i partisë Demokrate për Mallkastrën, Agron Kapllanaj ka reaguar pas lajmit të publikuar dje nga policia se kishte shoqëruar një grua, që thuhet se blinte vota në emër të tij.
Në një postim të bërë në rrjetet e tij sociale, Kapllanaj tha se mallakastriotët as nuk blihen, e as nuk shiten.
Sipas tij ky lajm është një sajesë e shpërndarë në media dhe si i tillë nuk e ndal ndryshimin në Mallakastër.
Ndër të tjera Kapllanaj thekson se përbuz çdo akt që ofendon qytetarët si dhe gjithkënd që tenton të bëjë pis karakterin e tij.
“Mallakastriotët as nuk blihen, e as nuk shiten.
Mallakastriotët janë qytetarë të punës e me vlera. Asnjë sajesë e shpërndarë në media, asnjë lajm i fabrikuar, nuk e ndal ndryshimin në Mallakastër.
Unë kam punuar e do të punoj me shpirt për këtë qytet e për çdo qytetar mallakastriot. Përbuz çdo akt që ofendon qytetarët, të cilët unë po kërkoj t’i përfaqësoj, ashtu sikurse përbuz gjithkënd që tenton të bëjë pis karakterin tim.
Ndryshimi është afër. Më 14 Maj, bashkë do ta rikthejmë Bashkinë te qytetarët”, shkruan Kapllanaj.
