Aktori francez Gaspard Ulliel, i njohur më së miri për rolin e Hannibal Lecter në “Hannibal Rising”, ka vdekur në moshën 37-vjeçare pas një aksidenti me ski në Francën juglindore.
“Gaspard Ulliel u rrit me kinemanë dhe kinemaja u rrit me të. Ata e donin njëri-tjetrin çmendurisht,”-shkroi sot kryeministri francez Jean Castex.
Ulliel vdiq të mërkurën në një spital në qytetin e Grenoble në Francën juglindore pas një aksidenti që pësoi me ski të martën.
Ai u transportua me helikopter drejt spitalit në Grenoble, por nuk u mbijetoi dot plagëve të marra.
Mediat franceze bëjnë me dije se Ulliel u përplas me një skiator tjetër në një pikë kalimi, duke pësuar një goditje në kokë.
I lënduar ka mbetur edhe skiatori tjetër, ndërkohë që policia franceze ka nisur hetimet në lidhje aksidentin.
Ministrja franceze e kulturës Rosalyne Bachelot e quajti Ulliel “një aktor i jashtëzakonshëm” në një postim në Twitter të publikuar të mërkurën.
“Sot bota e kinemasë humbi një talent të madh. I dërgoj ngushëllimet e mia familjes së tij dhe mendimet e mia janë për të gjithë ata që janë të pikëlluar sot për humbjen e tij”,-ka shkruar Bachelot./Opinion.al
