“Pas pesë ditësh në përballje të vazhdueshme me flakët, vatra e zjarrit në venddepozitimin e mbetjeve urbane në Elbasan është vënë më në fund nën administrim”, raporton gazetari i Tv Klan, Fatos Salliu.
Forcat zjarrfikëse nga Elbasani dhe bashkitë përreth, të mbështetura nga Drejtoria e Përgjithshme e Emergjencave dhe mjetet e Ministrisë së Mbrojtjes, kanë punuar ditë e natë për të shmangur përhapjen e mëtejshme të zjarrit.
Terreni i vështirë, sasia e madhe e mbetjeve dhe temperaturat e larta e kanë bërë ndërhyrjen jashtëzakonisht të vështirë. Vatra kryesore është inkapsuluar përmes hedhjes së ujit dhe inerteve, por ndotja e shkaktuar gjatë këtyre ditëve ka lënë gjurmë.
Banorët e Elbasanit dhe të zonave përreth shprehen të shqetësuar për pasojat në shëndet, duke thënë se tymi dhe smogu kanë qenë të padurueshëm.
“Kemi pasur vështirësi në frymëmarrje, fëmijët janë sëmurë, tymi nuk pushoi as natën”, thotë një banor.
“Nuk mund të jetojmë më kështu, kërkojmë zgjidhje nga institucionet. Po na dëmtohet shëndeti”, shprehet një tjetër.
“Era e rëndë e tymit na futej në shtëpi. Askush nuk merr përgjegjësi për këtë situatë që përsëritet”, shton një tjetër.
Për ngjarjen, Prokuroria e Elbasanit ka nisur një hetim për të përcaktuar shkaqet e ndotjes dhe origjinën e zjarrit. Deri më tani, as për këtë rast dhe as për ato të mëparshme, nuk ka një shkak zyrtar të konfirmuar për shpërthimin e flakëve.
Tv Klan
