Tymi i cigares është një nga faktorët kryesorë që çojnë në plakjen e parakohshme të lëkurës. Një dije e përgjithshme shkencore, e cila u rikonfirmua edhe nga Dr. Erjona Shehu diten e premte, në Konferencën për Reduktimin e Riskut nga Shoqata Kombëtare e Shëndetit Publik.
“Plakja është konsideruar që të jetë impakti kryesor i cigareve mbi lëkurën. Ka një mekanizëm të parakohshëm të plakjes, pasi ulet niveli i kolagjenit, degradohet cilësia e tij, dobësohet integriteti i lëkurës.”
Dermatologia e njohur solli në vëmendje edhe një tjetër pasojë, akoma më të padëshiruar, të cigareve mbi lëkurë.
“Duhanpirësit janë më të prirur të zhvillojnë skuamomën qelizore, veçanërisht në buzë.”
Sipas Erjona Shehut, ka vetëm një mënyrë sesi mund të arrihet reduktimi i dëmit të tymit të cigares mbi lëkurë.
“Konsensusi mes ekspertëve mjekësorë dhe ligjvënësve, është se nikotina në vetvete është relativisht e sigurt”, u shpreh Dr. Shehu, “Nga duhanpirësit, janë zgjedhur alternative të tjera si alternativa tërheqëse përballë cigareve.”
Sigurisht, mënyra më e mirë për të reduktuar dëmin e duhanit mbi lëkurë dhe në të gjithë trupin, është duke e lënë krejtësisht duhanin. Por, për ata të cilët e kanë të pamundur ta bëjnë këtë, alternativat pa tym, si përshembull produktet e duhanit me ngrohje, janë një zgjedhje më e mirë për lëkurën.
“Alternativa më të sigurta të miratuara edhe nga legjislacionet përkatëse, mund të përmirësojnë shëndetin publik dhe, në interesin e kësaj që po flasim, edhe cilësinë dhe shëndetin e lëkurës sonë.”, u shpreh Dr. Shehu.
