Turqia është tërhequr nga Konventa e Stambollit, një traktat i vitit 2011 për të parandaluar dhe luftuar dhunën ndaj grave. Ky vendim erdhi përmes një dekreti presidencial të nënshkruar sot që ngjalli kritika nga partitë kryesore të opozitës në vend.
Konventa i detyron qeveritë të miratojnë legjislacionin që trajton dhunën në familje dhe abuzime të ngjashme, të tilla si dhuna martesore dhe gjymtimi gjenital i femrave. Sipas konservatorëve, kjo masë do të minonte unitetin e familjes, duke inkurajuar divorcin dhe duke i dhënë hapësirë komunitetit LGBT për t’u pranuar më shumë në shoqëri.
Vendimi i Turqisë për t’u tërhequr nga Konventa e Stambollit “është një hap i madh mbrapa që minon mbrojtjen e grave në Turqi, në Evropë dhe më gjerë”.
Kështu deklaroi Sekretarja e Përgjithshme e Këshillit të Evropës, Marija Pejcinovic Buric, pas njoftimit të Ankarasë për tërheqjen e saj nga Konventa për mbrojtjen e grave nga dhuna. Konventa e cila “u nënshkrua nga 34 shtete evropiane dhe konsiderohet standardi ndërkombëtar për mbrojtjen e grave nga dhuna që ato vuajnë çdo ditë,” shtoi ajo. Këshilli i Evropës, tha një zëdhënës, nuk kishte ndonjë paralajmërim./Opinion.al
