Autoritetet turke kanë nisur kthimin e xhihadistëve të huaj në vendet e tyre të origjinës. Zëdhënësi i Ministrisë së Brendshme turke, Ismail Catakli tha se një amerikan tashmë është dëbuar, ndërsa disa evropianë janë në proces të dëbimit.
“Një luftëtar i huaj terrorist nga Shtetet e Bashkuara është dëbuar pasi janë kryer të gjitha procedurat. Planet e udhëtimit për shtatë luftëtarë terroristë me origjinë nga Gjermania po ashtu kanë përfunduar. Ata do të dëbohen më 14 nëntor nga Turqia”, tha Catakli.
Shtetet e Bashkuara dhe Gjermania nuk kanë bërë ende asnjë koment lidhur me ngjarjen.
Ndërkaq javën e kaluar, ministri i Brendshëm turk, Suleyman Soylu, u zotua se do t’i kthejë në vendet e origjinës të gjithë xhihadistët e huaj teksa ka kritikuar vendet perëndimore që kanë refuzuar t’i riatdhesojnë shtetasit e tyre, që i janë bashkuar Shtetit Islamik në Siri dhe Irak./Opinion.al
