Presidenti i Turqisë, Erdogan, njoftoi se trupat turke kanë nisur të vendosen në Libi. Disa vende, përfshirë Shtetet e Bashkuara, e kanë kundërshtuar ndërhyrjen e Turqisë në Libi pasi sipas tyre ndërhyrja e huaj e komplikon edhe më shumë situatën por Parlamenti turk miratoi vendimin javën e shkuar.
Erdogan nuk ka dhënë detaje për numrin e ushtarëve të dërguar në Libi por tha se misioni i tyre do të jetë sigurimi i stabilitetit për Qeverinë në Tripoli, e cila po lufton kryengritjen e forcave rebele, të udhëhequra nga gjenerali Khalifa Haftar, me bazë në lindje të Libisë.
“Detyra e ushtarëve tanë është koordinimi. Ata do të zhvillojnë një qendër operacioni atje” tha Erdogan teksa theksoi se synimi i Turqisë nuk është të luftojë, por “të mbështesë qeverinë legjitime dhe të shmangë tragjedinë humanitare”.
Gjenerali Haftar mbështetet nga Egjipti dhe Emiratet e Bashkuara Arabe, ndërsa qeveria në Tripoli ka mbështetjen e Turqisë dhe të aleates së saj, Katarit./Opinion.al
