Trupat turke dhe ruse nisën sot patrullimin e parë të përbashkët në verilindje të Sirisë.
Ky hap është në përputhje me një marrëveshje të arritur nga Ankaraja dhe Moska javën e kaluar, e cila ka ndërprerë ofensivën e Turqisë kundër luftëtarëve kurdë të Sirisë.
Ministria e Mbrojtjes e Turqisë tha në një postim në Twitter se patrullimet e përbashkëta “me njësi tokësore dhe ajrore” janë duke u zhvilluar në lindje të qytetit kufitar sirian, al-Darbasijah.
Më 22 tetor, presidenti turk, Erdogan, dhe presidenti rus, Vladimir Putin, kanë rënë dakord për të ndarë kontrollin në zonat kufitare në verilindje të Sirisë, duke iu dhënë kurdëve 150 orë kohë për t’u larguar. Me marrëvshjen Erdogan-Putin, Turqia do të ruajë kontrollin e zonës që ka marrë gjatë ofensivës.
