Vijon të rritet bilanci i viktimave nga tërmeti në Turqi. Autoriteti i Menaxhimit të Fatkeqësive Natyrore dhe Emergjencave raporton se ka shkuar në 62 numri i personave që kanë humbur jetën.
Deri në këto momente, të paktën 940 persona janë lënduar ndërsa janë tej mbushur spitalet.
Sipas mediave turke, deri tani janë nxjerrë nga rrënojat 100 qytetarë dhe vijojnë kërkimet në 9 ndërtesat e shembura nga tërmeti.
Autoritetet turke u kanë bërë thirrje qytetarëve që mos të futen në banesat e dëmtuara, pasi që pas tërmetit shkatërrues janë regjistruar edhe 35 tronditje të magnitudës më të lartë se 4 ballë dhe gjithsej 484 tronditje.
Më herët, presidenti turk Rexhep Tajip Erdogan tha se shumë shpejt shtëpi të reja do të ndërtohen për të gjithë ata që mbetën pa banesa.
Tërmeti që goditi të premten e 30 tetorit Detin Egje midis bregdetit turk dhe ishullit grek të Samos, kishte një magnitudë 6.6 të shkallës të Rihterit. Dëme të mëdha tërmeti shkaktoi edhe në Ishullin grek të Samosit. Në ishullin Samos humbën jetën dy adoleshentë nga tërmeti, ndërsa disa të tjerë mbetën të plagosur mes tyre dhe një shqiptar./ Opinion.al
