Brazili vendosi të shkarkojë trajnerin Dorival Jr. Lajmiu konfirmua nga federata e futbollit, CBF, pasi pesë herë kampionët e botës u mposhtën me shifrat e thella 4-1 nga rivalët e Argjentinës në Buenos Aires.
Humbja turpëruese dhe ecuria e dobët, me vendin e katërtnë kualifikueset e Kupës së Botës, plot 10 pikë larg albicelestëve, sollën vendimin e pashmangshëm. Tekniku ishte emëruar në krye të stolit në janar të vitit 2024.
62-vjeçari u bë trajner i “seleçaos” që deri në atë periudhë po vuante, sepse brenda një viti ishin vendosur dy trajnerë të përkoheshëm. Gjithçka ndodhi pasi Federata Braziliane u investua shumë në emërimin e Carlo Ancelotti-t, që në fund vendosi të qëndronte te Reali i Madridit.
“Jemi mirënjohës për punën që Dorival ka bërë me ekipin përfaqësues”, tha presidenti Ednaldo Rodrigues gjatë konferencës për shtyp. “Brenda një kohe të shkurtër do t’ju informojmë edhe se cili do të jetë pasardhësi në stol”, shtoi ai.
62-vjeçari Dorival Jr. u emërua te Brazili pas suksesit të arritur me Flamengon në vitin 2022, ku fitoi Kupën Libertadores dhe Kupën e Brazilit, me trofeun e fundit që e ngriti sërish pas një viti në krye të Sao Paulo.
Megjithatë, tekniku nuk arriti për asnjë moment që të nxirrte “seleçaon” nga kriza e lojës dhe rezultateve, për ti kthyer gjigandët botërorë në identitet. Dorival nuk arriti as të fitonte besimin e tifozerisë mjaft kërkuese braziliane, pasi fitoi vetëm 7 nga 16 ndeshjet ku drejtoi përfaqësuesen.
