Nejdet Cesuroglu, i kërkuar nga Prokuroria shqiptare si porositësi i heroinës së kapur në laboratorin e Hasit, u gjet i vdekur në Prishtinë në një banesë pas një operacioni të policisë kosovare ku u arrestuan katër persona si edhe u kapën 113 kg heroinë.
Vdekja e turkut që mbante edhe emrin Lavdërim Lima, ka ndodhur më datë 2 dhjetor 2018, por nuk dihet pse është mbajtur e fshehtë nga Policia e Kosovës.
Për këtë ngjarje ka kërkuar informacione edhe Prokuroria e Përgjithshme, duke qenë se shtetasi turk ishte në kërkim nga autoritetet shqiptare.
Autoriteti I hetimit në Shqipëri është në pritje të përgjigje të letërporosisë që u ka dërguar homologëve kosovarë, lidhur mbi rrethanat në të cilat ky shtetas ka humbur jetën.
Në banesën ku u gjet i vdekur Nejdet Cesuroglu, policia e Kosovës sekuestroi 113 kg heroinë.
Njoftimi i Prokurorisë
“Në kuadër të hetimeve për procedimin penal numër 339 të vitit 2016 është caktuar nga Gjykata për Krime të Rënda masa e sigurimit arrest në burg në mungesë për njërin prej personave të dyshuar si anëtar të grupit kriminal, shtetasit turk Nejdet Cesuroglu, që ka lidhje për faktin e zbulimit të laboratorit dhe të lëndës narkotike më datë 18.10.2018 në fshatin Brenogë Has. Nga Policia e Shtetit jemi njoftuar se më datë 02.12.2018 në Prishtinë, në kuadër të operacionit “FIRMA”, është gjetur i vdekur shtetasi turk Nejdet Cesuroglu, i datëlindjes 03.02.1969. Gjatë kontrollit të banesës, tek një dhomë e mbyllur janë gjetur tre valixhe të mbushura me 113 kg e 507 gram lëndë heroinë, për këtë fakt janë arrestuar nga autoritetet kosovarë katër shtetas”.
