Pastrimi i bregdetit dhe zonave të tjera turistike duhet të bëhet nga pushteti lokal që përpara ardhjes së sezonit të verës, por kjo s’ka ndodhur as këtë vit. Sërish në momentet e fundit, shohim se në ndihmë vjen ushtria e cila ka dalë në terren për të pastruar territorin.
Ministria e Mbrojtjes njofton ushtarët do të pastrojnë rrugët kryesore dhe zonat e frekuentuara nga turistët. Kodheli ndoqi nga afër punën e ushtarëve të cilët po bëjnë të mundur pastrimin e aksit të Morinës dhe i falënderoi për të gjithë punën e bërë.
“Kemi dhënë shembullin personal si Forcë e Armatosur, si Ministri e Mbrojtjes duke qenë prezent në të gjitha akset kryesore, në të gjithë rrugët kryesore për t’i pasur ato, të rregullta dhe mikpritëse për çdo turist që vjen nga jashtë, apo që këtu largohet për jashtë”, u shpreh ministrja Kodheli.
Pastrimi i aksit të Morinës po bëhet i mundur nga efektivët e DMR Kukës (Drejtoria Mbështetëse Rajonale). Ky aksion do të shtrihet edhe në zonat e tjera turistike dhe do të vazhdojë gjatë gjithë sezonit veror, vijoi ajo.
Përdorimi i ushtrisë për të pastruar hapi debat edhe vitin e kaluar, pasi ne jemi në të paktën vende në mos i vetmi që përdorim ushtarët për të mbledhur plehra. /Opinion.al
