Një turist holandez, i cili ka shtruar motrën në spitalin Infektiv në Tiranë pasi është infektuar me Covid-19 ka kërkuar që Ministria e Shëndetësisë të kontrollojë kushtet brenda spitalit, ku pacientët e infektuar po marrin trajtim spitalor.
Në një intervistë për “Syri TV”, turisti tha se brenda në spital është shumë nxehtë, si sauna madje e krahasoi me një kopësht zoologjik.
“Kam motrën time këtu prej mëse një jave. Gjatë javës së parë nuk kisha asnjë komunikim, nuk e dija se çfarë ndodhte brenda, por tani kam emrin e doktorit dhe flas. Problemi është se brenda është shumë vapë, si një sauna, si një kopsht zoologjik. I kërkoj Ministrit të Shëndetësisë të vijë e të kontrollojë, të shohë kushtet pasi ka probleme me mungesën e materialeve, është shumë keq. Ky është opinioni im. Më vjen shumë keq për qytetarët shqiptarë nëse do të vijnë në këtë spital. Nuk do të kenë fund të mirë, që të jem i sinqertë, pasi klima rreth spitalit nuk është e mire,”- thotë i riu.
Në Spitalin Infektiv të Tiranës po marrin trajtim spitalor krahas pacientëve shqiptarë edhe shtetas të huaj, të cilët janë infektuar gjatë pushimeve në Shqipëri.
Aktualisht të shtruar në spitalin Infektiv janë 73 pacientë të infektuar. Ndërsa ditët e fundit është shënuar dhe një rritje e numrit të të infektuarve. Në 24 orët e fundit, Ministria e Shëndetësisë njoftoi se janë regjistruar 658 raste të reja dhe 2 viktima./Opinion.al
